O vigués, amosouse encantado coa nova fichaxe do equipo, Pablo García, de quen espera que "aporte moito e sume a este grupo".

Borja Oubiña realizou onte a última sesión de traballo coa selección para preparar o partido que España disputará esta tarde en Badaxoz ante Liechtenstein. O vigués asegurou onte que afronta esta segunda convocatoria «coa mesma ilusión que a primeira, esperando que agora que é un partido oficial intentar sumar os tres puntos, non como en Islandia. Temos que tratar de facer as cousas ben para sumar os seis puntos, que é o que máis importa, que España encamiñe a clasificación».

Respecto da posibilidade de debutar coa camiseta nacional, tras quedar no banco no amistoso disputado en Islandia, o canteirán celeste recordou que «iso xa non depende de min, é algo que se me escapa. O que quero é axudar, que é o que podo aportar. O resto, o que eu non podo controlar, nin me preocupa nin me crea impaciencia. Estou aquí para axudar, non para debutar, aínda que se podo facelo, evidentemente estarei encantado».

Para o centrocampista olívico ter a confianza de Aragonés «é o que importa. Para min o fundamental, primeiro, é estar aquí; segundo, que España gañe. O resto son cousas secundarias».

En canto aos rivais sinalou que Liechtenstein e Irlanda do Norte «supostamente son inferiores, pero o fútbol está cada vez máis equilibrado. Antes, recordo que con seleccións menores sempre había goleadas. Agora ante equipos como Liechtenstein pásase mal. Portugal pasouno mal hai pouco, gañou 2-1 e grazas. Cada vez isto iguálase máis. Hai máis medios, máis capacidade de traballo por parte dos equipos e todo está máis igualado e máis difícil».

Oubiña recoñeceu por outra banda que «a afección vainos a esixir gañar» aínda que engadiu que «España non ten historial como para esixir nada. Si para esixir estar nunha fase final, pero dentro das fases finais ten que haber ilusión e ganas. Non temos historial para esixir moito máis».

O canteirán celeste referiuse ademais ao grupo no que quedou encadrado España: «é un grupo complicado. En teoría Suecia e Dinamarca son as que teñen máis nome, pero calquera partido podente complicar e logo págalo. O importante é empezar ben, sumar seis puntos e non ter dependencia doutros partidos. Depender simplemente dun e non mirar máis aló».

Borja Oubiña sabe que está nunha das tempadas máis importantes e decisivas da súa vida como profesional: «Este ano tamén é moi importante e intentarei facer as cousas ben en Vigo. Espero que todo siga ben e a ver aquí se podemos facernos un oco».

Reto europeo

O medio centro celeste comentou por outra banda que afronta o novo reto europeo do Celta «con moitas ganas». «Logo de pasar un ano malo en Segunda, habernos recuperado como o ano pasado, pois está moi ben. Volver a Europa, en Vigo significa moito e queremos pasear o nome da cidade por Europa. Para nós é moi importante deixalo moi arriba e facer unha boa campaña. O que vimos que o ano pasado o Sevilla serviunos de guía a todos».

O xogador celeste asegurou que esta tempada, no que á Liga refírese, o seu equipo aspira a estar na parte alta: «Na Liga, a pelexar e complicar as cousas aos grandes, á xente de arriba, a toda esta xente que o ano pasado fallou e que nós aproveitamos esa oportunidade. Este ano hai que intentar estar con eles. O resultado final é un pouco igual, quinto ou sétimo. O importante é facer as cousas ben e complicar as cousas á xente da zona alta, que seguro que o imos a facer».